រាសី ប្រចំាថ្ងៃសុក្រ ទី២៣ ខែឧសភា ឆ្នាំ២០១៤
ឆ្នាំជូត រាសីស្រុតចុះ។ លោកអ្នកគប្បីប្រយ័ត្នគ្រប់វិនាទីទាំងអស់ព្រោះថាថ្ងៃនេះលោកអ្នកនឹងត្រូវទទួលរងនូវការឈឺផ្សាបណ្តាលមកពីការបំពេញការងារគ្មានការប្រុងប្រយ័ត្ន។ ទឹកចិត្តក្លាហានកម្លាំងកាយមានបរិបូរណ៍តែខ្វះនូវគំនិតច្នៃប្រឌិត។ ការនិយាយស្តីទៅតាមការនឹកឃើញខ្វះការពិចារណា។ រីឯបញ្ហាស្នេហាលោកអ្នកអាចនឹងមានការអាក់អន់ចិត្តចំពោះដៃគូ។
ឆ្នាំឆ្លូវ រាសីមធ្យម។ រាល់ការប្រកបរបររកទទួលទានបានផលជាបង្គួរ។ ការធ្វើដំណើរទៅកាន់ទីជិតឆ្ងាយមិនសូវមានគេទទួលរាក់ទាក់ប៉ុន្មានទេ។ ការនិយាយស្តីអាចមានគេនិន្ទាខ្លះៗដោយមិនដឹងខ្លួន។ បញ្ហាស្នេហាមានសភាពជាធម្មតាគ្មានអ្វីគួរឲ្យបារម្ភឡើយ។ ទឹកចិត្តកើតមាននូវក្តីសៅហ្មងមួយចំនួន ទាំងនេះបណ្តាលមកពីសុខភាពមិនសូវអំណោយផល។
ឆ្នាំខាល រាសីឡើងខ្ពស់ត្រដែត។ សុខភាពផ្លូវកាយរឹងមាំល្អ ផ្លូវចិត្តក៏ល្អព្រមដែរពោលគឺមានសភាពស្ងប់ស្ងាត់ នឹងធឹងមិនតក់ស្លុតនៅក្នុងហេតុការណ៍ផ្សេងៗឡើយ ហេតុនេះលោកអ្នកមានសមត្ថភាពបំពេញកិច្ចការក្នុងការងារក៏ដូចជាមុខរបររបស់លោកអ្នកបានយ៉ាងល្អ។ គូស្នេហ៍គប្បីយកចិត្តទុកដាក់ចំពោះគ្នា ដើម្បីកុំឲ្យរឿងអាក្រក់ ឬមានការអាក់អន់ចិត្តគ្នាកើតឡើង។
ឆ្នាំថោះ រាសីមធ្យម។ ការធ្វើដំណើរទៅកាន់ទីជិតឆ្ងាយដើម្បីបំពេញការងារក្តី ដើម្បីពិភាក្សាពីអាជីវកម្មក្តីតែងបានផលជាមធ្យម។ សុខភាពមិនមានផលប៉ះពាល់អ្វីឡើយ។ ទឹកចិត្តសោមនស្សរីករាយ ប៉ុន្តែលោកអ្នកគួរយកចិត្តទុកដាក់បន្តិចចំពោះបញ្ហាស្នេហា ព្រោះវាអាចមានទំនាស់ខ្លះៗកើតឡើង។ ការនិយាយស្តីខ្វះការពិចារណាច្រើនមិនហុចផលល្អប៉ុន្មានឡើយ។
ឆ្នាំរោង រាសីស្រុតចុះ។ រាល់ការសម្រេចចិត្តផ្សេងៗគប្បីសុំយោបល់ពីអ្នកដែលមានបទពិសោធ។ ការប៉ាន់ស្មានស្ថានការណ៍ច្រើនតែខុស។ ផ្លូវចិត្តមានសភាពតានតឹងខ្លាំង។ ការធ្វើដំណើរទៅកាន់ទីជិតឆ្ងាយត្រូវប្រយ័ត្ន។ ដំណឹងដែលទទួលបានមានរឿងល្អលាយឡំនឹងរឿងមិនសូវល្អ។ បញ្ហាស្នេហាក៏ត្រូវតែអត់ធ្មត់ប្រយ័ត្នឈានដល់ការបែកបាក់គ្នា។
ឆ្នាំម្សាញ់ រាសីខ្ពស់ត្រដែត។ ការប្រកបរបររកទទួលទានបានផលជាបង្គួរ។ ការនិយាយស្តីពីរោះពិសាធ្វើឲ្យអ្នកផងស្រឡាញ់ចូលចិត្ត និងគោរពចំពោះគុណធម៌របស់លោកអ្នក។ លោកអ្នកខិតខំបំពេញការងារយ៉ាងយកចិត្តទុកដាក់ឆន្ទៈមោះមុត និងតស៊ូព្យាយាម។ គូស្នេហ៍យោគយល់អធ្យាស្រ័យឲ្យគ្នា និងបង្កភាពផ្អែមល្ហែមឲ្យគ្នាទៅវិញទៅមកលើសគ្រាកន្លង។
ឆ្នាំមមី រាសីខ្ពស់ត្រដែត។ សុខភាពផ្លូវកាយមានសភាពល្អប្រសើរ ព្រមជាមួយនឹងសុខភាពផ្លូវចិត្តក៏ពុំមានហេតុដែលនាំឲ្យសៅហ្មងអ្វីឡើយ ធ្វើឲ្យការងារសព្វសារពើទទួលបានជោគជ័យ។ នេះគឺបណ្តាលមកពីលោកអ្នកមានឆន្ទៈមោះមុតប្រកបដោយការព្យាយាមលើផ្លូវដែលត្រឹមត្រូវធ្វើឲ្យអ្នកផងទាំងពួងពេញចិត្តជាខ្លាំង។ គូស្នេហ៍បង្កើនការយកចិត្តទុកដាក់ចំពោះគ្នា។
ឆ្នាំមមែ រាសីស្រុតចុះ។ ការបំពេញកិច្ចការមិនស្វាហាប់ធ្វើឲ្យអ្នកដទៃខ្វះទំនុកចិត្តចំពោះរូបអ្នក។ ការនិយាយស្តីច្រើនធ្វើឲ្យប៉ះពាល់ដល់អ្នកដទៃដោយមិនដឹងខ្លួន។ លោកអ្នកហាក់ដូចជាមានចិត្តសប្បាយរីករាយបែបអាត្មានិយមធ្វើឲ្យអ្នកដទៃក្តៅក្រហាយ។ ការប្រកបរបររកទទួលទានអាចរងការខាតបង់តិចតួច។ សេចក្ដីស្នេហាអាចមានការទាស់ទែងគ្នាពុំខានឡើយ។
ឆ្នាំវក រាសីមធ្យម។ ការនិយាយស្តីមានលើសលស់ខុសឆ្គងទៅកាន់អ្នកផងគ្នា។ មុខរបររកទទួលទានហុចផលចំណេញបន្ទាប់បន្សំមិនជាច្រើនដូចការរំពឹងទុក។ ទឹកចិត្តមានភាពមោះមុតអង់អាច ប៉ុន្តែគប្បីកុំបណ្តែតបណ្តោយតាមចិត្តនឹកឃើញឲ្យសោះ ពុំនោះទេប្រាកដជាមានផលអាក្រក់ចំពោះអ្នក។ គូស្នេហ៍អាចខ្វះការយល់ចិត្តគ្នាបណ្តាលឲ្យទំនាស់តូចតាចប្រែក្លាយជាធំ។
ឆ្នាំរកា រាសីខ្ពស់ត្រដែត។ លោកអ្នកមានសមត្ថភាពគ្រប់គ្រាន់អាចបំពេញការងារដែលនៅចំពោះមុខបានយ៉ាងល្អប្រសើរ។ ទឹកចិត្តប្រកបដោយក្តីមេត្តា និងករុណាចំពោះមនុស្ស និងសត្វផងគ្នា។ ការនិយាយស្តីប្រកបដោយការត្រិះរិះពិចារណាយ៉ាងល្អិតល្អន់មុននឹងចេញវាចាទៅកាន់អ្នកផងគ្នា។ រីឯបញ្ហាស្នេហាក៏ពុំមានអ្វីគួរឲ្យបារម្ភឡើយ។
ឆ្នាំច រាសីមធ្យម។ ការប្រកបរបររកទទួលទានបានចំណេញតិច។ ប៉ុន្តែទឹកចិត្តមានក្ដីសោមនស្សរីករាយ។ សុខភាពផ្លូវកាយក៏ល្អប្រសើរ។ ការនិយាយស្តីមានហេតុផល ប៉ុន្តែជាអកុសលថ្ងៃនេះលោកអ្នកជួបតែជនអគិត។ ការធ្វើដំណើរជិតឆ្ងាយមានសុវត្ថិភាព។ លោកអ្នកនឹងទទួលបាននូវដំណឹងល្អគួរជាទីពេញចិត្ត។ បញ្ហាស្នេហាមានដំណើរការទៅយ៉ាងរលូន។
ឆ្នាំកុរ រាសីស្រុតចុះ។ ការប្រកបរបររកទទួលទានធ្វើឲ្យលោកអ្នកមានអារម្មណ៍ថាខាតកម្លាំងញើសឈាមអត់ប្រយោជន៍។ ប៉ុន្តែលោកអ្នកនឹងទទួលបានបទពិសោធដ៏មានតម្លៃ។ លោកអ្នកគប្បីស្វះស្វែងរកចំណេះដឹងបន្ថែមទៀត។ ការធ្វើដំណើរជិតឆ្ងាយមានគេទទួលស្វាគមន៍រាប់អានយ៉ាងស្មោះស្ម័គ្រ។ គូស្នេហ៍ប្រយ័ត្នមានបញ្ហាដោយសារពាក្យសម្តី។
No comments:
Post a Comment