រាសី ប្រចំាថ្ងៃពុធ ទី២៣ ខែមេសា ឆ្នាំ២០១៤
ឆ្នាំជូត រាសីល្អបង្គួរ។ គួរពិចារណាឲ្យបានហ្មត់ចត់មុននឹងនិយាយទៅកាន់អ្នកផង ដើម្បីកុំឲ្យគេមើលស្រាលនិន្ទា។ ការប្រកបរបររកទទួលទាននឹងបានផលបង្គួរ។ លោកអ្នកអាចទទួលដំណឹងដែលនឹកស្មានមិនដល់ក្នុងថ្ងៃនេះ។ សុខភាពផ្លូវកាយមាំមួនធម្មតាតែសុខភាពផ្លូវចិត្តរងសម្ពាធអវិជ្ជមានខ្លះៗ។ អំពីរឿងស្នេហា គូស្នេហ៍មានអធ្យាស្រ័យល្អចំពោះគ្នា។
ឆ្នាំឆ្លូវ រាសីឡើងខ្ពស់។ សុខភាពល្អធម្មតាស្របនឹងផ្លូវអារម្មណ៍ក៏ស្រស់ស្រាយសប្បាយចិត្ត។ ការធ្វើដំណើរទៅកាន់ទីជិតឆ្ងាយបំពេញការងារផ្សេងៗអាច ជួបនូវឧបសគ្គជាមុនទើបទទួលជោគជ័យតាមក្រោយ។ ការនិយាយស្តីទៀងត្រង់ធ្វើឲ្យអ្នកផងជឿទុកចិត្ត។ ចំពោះរឿងស្នេហាគូស្នេហ៍យកចិត្តទុកដាក់មើលថែទាំគ្នាធ្វើឲ្យចំណងមេត្រីកាន់តែរឹងមាំ។
ឆ្នាំខាល រាសីមធ្យម។ ការប្រកបរបររកទទួលទានការខាតបង់ព្រោះការធ្វេសប្រហែលមើលស្រាលស្ថានការណ៍ ប៉ុន្តែលោកអ្នកនឹងបាននូវបទពិសោធដ៏ល្អមកវិញ។ ការធ្វើដំណើរទៅទីជិតឆ្ងាយមានគេស្វាគមន៍រាក់ទាក់។ ការនិយាយស្តីមានអ្នកខ្លះស្ដាប់ និងខ្លះមិនយកចិត្តទុកដាក់។ សុខភាពមិនសូវល្អតែផ្លូវចិត្តល្អធម្មតា។ គូស្នេហ៍ហាក់ព្រងើយកន្តើយដាក់គ្នា។
ឆ្នាំថោះ រាសីឡើងខ្ពស់ត្រដែត។ ការបំពេញការងារនឹងទទួលបាននូវជ័យជម្នះក្រោយពីលោកអ្នកបានវិនិយោគកម្លាំងកាយចិត្តកន្លងមក។ ការពោលពាក្យសម្តីពីរោះពិសា។ ទឹកចិត្តមានមេត្តាករុណា និងគុណធម៌។ យ៉ាងណាមិញគួរយកចិត្តទុកដាក់ជាចម្បងទៅលើសុខភាពបន្តិច។ ការធ្វើដំណើរមានសុវត្ថិភាព។ ចំពោះរឿងស្នេហាអ្វីៗដំណើរការល្អធម្មតា។
ឆ្នាំរោង រាសីមធ្យម។ ការប្រកបរបររកទទួលទានផ្សេងៗបានផលសមស្របជាមួយនឹងការចំណាយ ពោលគឺមិនច្រើន ហើយក៏មិនតិចដែរ។ថ្ងៃនេះលោកអ្នកអាចទទួលលាភតិចតួចពីចម្ងាយ។ ការធ្វើដំណើរទៅកាន់ទីជិតឆ្ងាយគួរប្រយ័ត្នបន្តិច។ សុខភាពមាំមួនរហ័សរហួនតែផ្លូវចិត្តស្មុគស្មាញ។ រឿងស្នេហាអាចមានកើតការប្រចណ្ឌ ឬយល់ច្រឡំនានាកើតឡើង។
ឆ្នាំម្សាញ់ រាសីមធ្យម។ សុខភាពផ្លូវកាយអំណោយផល តែលោកអ្នកបែរជារសាប់រសល់ក្នុងចិត្តរកមូលហេតុពុំឃើញ។ ការប្រកបរបររកទទួលទានហុចផលច្រើនគួរសម។ ការធ្វើដំណើរទៅកាន់ទីជិតឆ្ងាយមានឧបសគ្គខ្លះៗ។ លោកអ្នកមានសមត្ថភាពបំពេញការងារ ប៉ុន្តែទាមទារជំនឿចិត្តក្នុងការពុះពារទៅមុខ។ គូស្នេហ៍មានការអនុគ្រោះនិងយល់អធ្យាស្រ័យគ្នាបានល្អ។
ឆ្នាំមមី រាសីមធ្យម។ រាល់ការធ្វើដំណើរដោយមធ្យោបាយផ្សេងៗត្រូវមានការប្រុងប្រយ័ត្ន ក្នុងកម្រិតខ្ពស់។ លោកអ្នកគួរការពារចិត្តកុំឲ្យធ្លាក់ទៅក្នុងអកុសល ឬការអូសទាញរបស់អ្នកដទៃ។ ដោយអានុភាពនៃកម្លាំងកាយមានភាពខ្លាំងក្លា ធ្វើឲ្យការបំពេញការងារបានល្អ តែត្រូវប្រើកម្លាំងកាយអស់យ៉ាងច្រើន។ បញ្ហាស្នេហា ដៃគូចេះផ្ដល់ភាពកក់ក្ដៅឲ្យគ្នាទៅវិញទៅមក។
ឆ្នាំមមែ រាសីស្រុតចុះខ្លាំង។ ការបំពេញការងារខ្វះការយកចិត្តទុកដាក់ ដែលជាហេតុបណ្តាលឲ្យលទ្ធផលមិនសូវល្អ។ រីឯការពោលពាក្យសម្តីខ្វះការពិចារណាជាហេតុនាំឲ្យអ្នកដទៃមើល ស្រាល កត់ចំណាំនូវចំណុចខ្សោយរបស់អ្នក។ បញ្ហាស្នេហាអាចមានការទាស់ទែងគ្នាបណ្តាលមកពីការនិយាយស្តី។ សុខភាពរបស់លោកអ្នកត្រូវជ្រៀតជ្រែកដោយជំងឺតម្កាត់នានា។
ឆ្នាំវក រាសីស្រុតចុះ។ សមត្ថភាពបំពេញការងារធា្លក់ចុះ ជាហេតុបណ្តាលឲ្យរបររកទទួលទានមានការខាតបង់ និងធ្លាក់ទឹកចិត្តយ៉ាងខ្លាំង ដែលមានដើមហេតុចម្បងបំផុតគឺសុខភាពផ្លូវកាយមានបញ្ហា។ ការធ្វើដំណើរគួរប្រយ័ត្នប្រយែងបន្តិច។ លោកអ្នកគួរស្វែងរកវិធីផ្ដល់កម្លាំងចិត្តដល់ខ្លួនឯង។ គូស្នេហចាំចាប់កំហុសគ្នា និងមានការអធ្យាស្រ័យចំពោះគ្នាតិចតួចណាស់។
ឆ្នាំរកា រាសីឡើងខ្ពស់ត្រដែត។ សុខភាពផ្លូវកាយ និងផ្លូវចិត្តល្អប្រសើរគ្របដណ្តប់ទៅលើទង្វើល្អសុចរិត និងត្រឹមត្រូវរបស់លោកអ្នក។ ការពោលពាក្យសម្តីទៅកាន់អ្នកផងតែងប្រកបដោយវិចារណញ្ញាណ។ ការប្រកបរបររកទទួលទានបានផលល្អ។ ការធ្វើដំណើរទៅកាន់ទីនានាមានសុវត្ថិភាពគួរជាទីទុកចិត្ត។ គូស្នេហ៍មានចំណងមេត្រីភាពកាន់តែផ្អែមល្ហែម។
ឆ្នាំច រាសីស្រុតចុះ។ មុខរបររកទទួលទានមានការខាតបង់ដោយសារការពោលពាក្យសម្តីមិនសមរម្យគ្មានសេចក្តីរាក់ទាក់ចំពោះភ្ញៀវ។ សុខភាពផ្លូវកាយមិនសូវល្អ ឬអាចមានជំងឺ។ ទឹកចិត្តពោរពេញដោយអកុសល។ ការធ្វើដំណើរទៅកាន់ទីជិតឆ្ងាយគ្មានសុវត្ថិភាព។ គូស្នេហ៍នឹងខិតខំស្វែងយល់ចិត្តរបស់លោកអ្នកដើម្បីចៀសវាងការបែកបាក់គ្នាដោយកត្តាផ្សេងៗ។
ឆ្នាំកុរ រាសីឡើងខ្ពស់ត្រដែត។ សុខភាពល្អបរិបូរណ៍ ស្របនឹងផ្លូវចិត្តក៏ជ្រះថ្លាពោរពេញដោយកុសល។ ការនិយាយស្ដីហ្មត់ចត់ច្បាស់លាស់ ធ្វើឲ្យអ្នកផងគោរពជឿជាក់។ ការធ្វើដំណើរអាចមានរឿងមករំខានខ្លះៗតែមិនជាបញ្ហាធំដុំទេ។ ថ្ងៃនេះលោកអ្នកនឹងទទួលបានដំណឹងសប្បាយរីករាយ។ ការប្រកបរបររកទទួលទានបានផលច្រើន។ គូស្នេហ៍មានភាពស្អិតល្មួតនឹងគ្នា។
No comments:
Post a Comment