ជនជាតិចិន ត្រូវបានគេដឹងឮទូទៅថា មានប្រជាជនលំដាប់នាំមុខគេនៅលើលោកនេះជាមួយនឹងមោទនភាពនេះ គេទាំងឡាយ តែងតែចង់ស្វែងយល់ពីវប្បធម៌ និងជីវភាពរស់នៅរបស់ជនជាតិចិន ជាពិសេស លក្ខណៈប្រពៃណីបរមបុរាណផ្សេងៗ ដែលបន្តរហូតដល់សព្វថ្ងៃនេះ ដេលក្នុងនោះមានប្រពៃណីចូលឆ្នាំចិនផងដែរ... ។
* ថ្វាយព្រះ សុំសេចក្តីសុខ :
គ្រឿងសំណែន ឆ្លុះបញ្ចាំងឲ្យឃើញពីជំនឿចំពោះវត្ថុស័ក្តិសិទ្ធិ ម្ហូបអាហារដែលដាក់រៀបសែនព្រេន តាមបំណងព្រះ នឹងបានសិរីមង្គល ដូចជា ជ្រូក ភាពធាត់ទ្រលុករបស់ជ្រូកបង្ហាញពីការស៊ីឆ្ងាញ់ ដេកស្រួល, មាន់រងាវទៀងពេលរៀងរាល់ព្រឹក បង្ហាញពីការយល់ការងារ តៅហ៊ូ ប្រែថា បុណ្យ ឬសេចក្តីសុខ ។ ក្រៅពីនេះ នៅថ្ងៃបុណ្យចូលឆ្នាំចិន មានការសំពះបុព្វបុរស ជាពិសេស នៅពេលសែនផ្នូរ បានបង្ហាញពីទឹកចិត្តកតញ្ញូចំពោះអ្នកមានគុណណូបការៈ ហើយយកមកប្រតិបត្តិគ្រួសារនឹងបានចម្រុង ចម្រើនទៅ ។
* ជូនពរ ដោយលុយតិអៀ :
ទំនៀមទម្លាប់ចិន ពីសម័យចាស់តែងតែយក កាក់ទងដែង ១០០កាក់ ចងជាចង្កោម ដោយអំបោសក្រហម ឲ្យក្មេង មុនថ្ងៃចូលឆ្នាំថ្មី ដែលមានន័យថា រារាំងភាពស៊យ យីអ៊ុនដាក់ ឬខ្មោចព្រាយបិសាច មកបៀតបៀន ហើយបច្ចុប្បន្នបានវិវឌ្ឍន៍មកដាក់ ក្រដាសលុយក្នុងស្រោមសំបុត្រក្រហម (អាំងប៉ាវ) ឬវត្ថុផ្សេងៗ ។ ចំនុចសំខាន់ក្នុងការជូនអាំងប៉ាវ ឬតិអៀនេះ គឺដើម្បីសិរីមង្គល ។ ប្រសិនបើមនុស្សចាស់ ឲ្យទៅក្មេងៗ គឺជូនពរឲ្យចម្រើនលូតលាស់ មាំមួន ឬបើមនុស្សចាស់ ប្រគល់ឲ្យកូនចៅដែលមានការងារធ្វើ ហើយ ចាត់ទុកជាការជូនពរឲ្យចម្រើនថែមទៀត សុខភាពល្អបរិបូណ៌ ។ ចំណែកកូនដែលមានការងារធ្វើហើយ ជូនទៅឪពុកម្តាយ គឺដើម្បីជូនពរឲ្យលោកមានកម្លាំងពលំមាំមួន អាយុយឺនយូរ ។
* ជួបជុំសាច់ញាតិប្រុសស្រី :
ក្នុងថ្ងៃសំពះដូនតា នៃរដូវចូលឆ្នាំចិន បងប្អូនសាច់ញាតិ តែងតែមកជួបជុំគ្នាមូលត្រកូល សំពះដូនតា ដើម្បីសុំសេចក្តីសុខ ចម្រើន ហើយជូនពរជ័យគ្នាទៅវិញទៅមក ប្រកបដោយបរិយាកាសសប្បាយរីករាយ កក់ក្តៅក្នុងរង្វង់គ្រួសារ ជាទម្លាប់ដ៏ល្អ ដែលនាំ ឲ្យកើតភាពសិ្នទ្ធស្នាល ស្រឡាញ់រាប់រកគ្នា សាមគ្គីភាព ក្នុងក្រុមញាតិសន្តាន ។
* និយាយពាក្យពិរោះដាក់គ្នា :
ជនជាតិចិន ជឿយ៉ាងមុតមាំថាថ្ងៃចូលឆ្នាំ ត្រូវនិយាយតែសម្តីពិរោះពិសារ រកគ្នា ចៀសវាងពាក្យព្រហើនគ្រោតគ្រាត អសុរោះ ដើម្បីស្វាគមន៍ដល់ឆ្នាំថ្មី និងរឹតចំណងមេត្រីភាពស្រឡាញ់គ្នា បានសុខតទៅ ។
* គ្រួសារចិន ផ្តោតភាពសំខាន់លើភាពឧស្សាហ៍ និងអត់ធត់ :
ក្នុងប្រវត្តិសាស្ត្រចិន ជនជាតិចិនតែងតែជួបប្រទះគ្រោះភ័យធម្មជាតិ និងភ្លើងសង្គ្រាមជាញឹកញាប់ ដែលជាមូលហេតុនៃភាពក្រីក្រលំបាក រហូតត្រូវភៀសខ្លួនចេញពីភយន្តរាយទាំងនោះ ហើយជំរុញឲ្យជីវិតត្រូវតស៊ូ រើបម្រះក្លាយជាគំនិតអប់រំជនជាតិចិនថា ត្រូវឧស្សាហ៍ព្យាយាម អត់ធ្មត់ ស្របគ្នានឹងគំនិតវៃឆ្លាតផ្នែកជំនួញផងនោះ ទីបំផុតជនជាតិចិន ក៏អាចកសាងខ្លួនបានយ៉ាងជោគជ័យ និងក្លាយជាអ្នកមានទ្រព្យសម្បត្តិស្តុកស្តម្ភ ។
* ខិតខំថែទាំសុខភាព :
ជនជាតិចិន ចាប់អារម្មណ៍លើសុខភាពណាស់ គេយល់ថា ម្ហូបអាហារទាំងឡាយជាថ្នាំ ។ ស្ត្រីតែងតែមានគំនិតយល់ដឹងច្រើនជាងបុរស ក្នុងរឿងការងារផ្ទះសម្បែង ។ មេផ្ទះឆ្នើមតែងតែមានស្នាដៃឯក ក្នុងការចម្អិនម្ហូបអាហារ ដើម្បីបំប៉នសុខភាពមនុស្សក្នុងគ្រួសារ ៕
No comments:
Post a Comment