ចាប់តាំងពីថ្ងៃដំបូងដែលកូនតូចចូលផ្ទះ មានជំនឿថា គួរមានមនុស្សដែលងាយប្រដៅទូន្មាន ហើយមានសុខភាពល្អ មកក្រាលកន្លែងគេងឲ្យកូនតូចព្រោះគេមានជំនឿថា កូនតូចនោះនឹងមានឧបនិស្ស័យប្រហាក់ប្រហែលមនុស្សដែលក្រាលកន្លែងគេង ឲ្យវានោះ ។ នៅថ្ងៃដំបូង ដែលនាំទារកចូលផ្ទះនោះ គួរតែសែនជំនាងផ្ទះ ប្រាប់ពីសមាជិកដែលមកថ្មី ឲ្យព្រលឹងជីដូនជីតា ជួយឃុំគ្រងកូនតូច ឲ្យមានសំណាងល្អ ប្រាជ្ញាឆ្លាតវៃ និង សុខភាពមាំមួន ។
* ទារកដែលគេងផ្កាប់បានយូរ និងគេងផ្ងារឆាប់ភ្ញាក់ ?
គេមានជំនឿថា ’ក្មេងគេងផ្កាប់អាចគេងបានយូរ ជាងក្មេងដែលគេងផ្ងារ” ប៉ុន្តែ តាមពិតទារកគេងផ្កាប់ ងាយប្រឈមមុខនឹងគ្រោះថ្នាក់ដល់ជិវិត ដោយសារថប់ដង្ហើម និងមានការផ្តល់ជាឱវាទខ្លះៗថា មិនគួរឲ្យក្មេងគេងផ្កាប់រយៈពេលយូរពេកទេ ហើយមិនគួរឲ្យនៅឆ្ងាយពីភ្នែកមនុស្សចាស់ ព្រោះថាអាចបាត់បង់ជីវិតពេលគេងលក់ ។
ក្រៅពីនេះ អ្នកខ្លះមានជំនឿថា ការគេងផ្កាប់ ធ្វើឲ្យក្មេងមានក្បាលស្អាត តែផ្ទុយទៅវិញ ការគេងផ្ងារដោយផ្អៀងក្បាល ក៏ក្បាលស្អាតដូចគ្នាដែរ ប៉ុន្តែបើកូនរបស់អ្នក គេងលក់ស្រួល គួរបណ្តោយខ្លះ កុំឲ្យប្រឆាំងនឹងធម្មជាតិ ធ្វើឲ្យកូនរបស់អ្នកគេងបានយូរ ។
* ការកោរសក់ទារកពីកំណើត :
ពេលដែលទារកមានអាយុគ្រប់១ខែ ឬ៥០ថ្ងៃ គេមានជំនឿថា ត្រូវកោរសក់កំំណើតចេញ ព្រោះវា ក្តៅ និង កខ្វក់ ត្រូវកោរចោល ដើម្បីស្រួលចិញ្ចឹមមិនក្តៅ ហើយស្អាត ។ ប៉ុន្តែ នាពេលបច្ចុប្បន្ន គ្រូពេទ្យខ្លះ ណែនាំថាមិនគួរកោរសក់កំណើត ព្រោះធ្វើឲ្យក្បាលរបស់ក្មេងប៉ះពាល់នូវភាពត្រជាក់ ដោយសារគ្មានសរសៃសក់គ្រប ហើយងាយផ្តាសាយ ហើយបើសិនមានរបួស ដោយផ្លែឡាម ឬកាំបិតកោរវិញ វានឹងធ្វើឲ្យកូនរបស់អ្នក ផ្សាក្រហាយស្បែកក្បាលខ្លាំង ដូចគ្នានឹងយើងលាងសម្អាតដំបៅដែរ ។
ចំពោះជំនឿពីការកាត់ក្រចក ថា មិនត្រូវកាត់ក្រចក ទុកទម្រាំដល់ថ្ងៃកោរសក់កំណើត លុះកោរសក់រួចហើយ គឺត្រូវកាត់ក្រចកដៃ ក្រចកជើង ហើយពាក់ស្រោមដៃឲ្យក្មេង ។ នៅក្នុងរបាយការណ៍ថែទាំក្មេង តែងតែឲ្យម្តាយមិនបាច់ពាក់ស្រោមដៃឲ្យកូន ហើយអាចកាត់ក្រចកបាន ដោយគេជឿថា ការដែលកូនបានប្រើដៃប៉ះពាល់វត្ថុផ្សេងៗជុំវិញខ្លួន ជាការជំរុញការលូតលាស់ដ៏ល្អដល់កូន ច្រើនជាងការពាក់ស្រោមដៃ ។ ម្យ៉ាងទៀត ស្រោមដៃ អាចគ្មានសុវត្ថិភាព បើសិនមានកម្ទេចអំបោះរុំ ម្រាមដៃកូន ឬកូនបៀមចូមាត់ នាំឲ្យស្លាក់បាន ។ ប៉ុន្តែ ក្មេងខ្លះរពឹស ខ្វាចមុខមាត់ខ្លួនឯង ដោយក្រចកវែង នេះក៏ជាបញ្ហាធ្វើឲ្យម្តាយ ត្រូវរកវិធីដោះស្រាយ ដោយការពាក់ស្រោមដៃឲ្យ ។
* ញ៉ាំចេកណាំវ៉ា ងាយចិញ្ចឹម :
មានជំនឿថា ឲ្យកូនញ៉ាំចេកណាំវា កាន់តែឆាប់ កាន់តែល្អ ទើបគ្រួសារខ្លះ ឲ្យកូនតូចញ៉ាំចេក តាំងពីអាយុគ្រប់១ខែ ព្រោះជឿថា ញ៉ាំឆ្អែត គេងលក់យូរស្រលចិញ្ចឹម ដែលផ្ទុយពីការណែនាំផ្នែកពេទ្យបច្ចុប្បន្ន ឲ្យចិញ្ចឹមកូនដោយទឹកដោះម្តាយតែមួយមុខ រហូតដល់អាយុយ៉ាងតិច៦ខែ ៕
No comments:
Post a Comment