រាសី ប្រចំាថ្ងៃព្រហស្បត៏ ទី២៧ ខែមីនា ឆ្នាំ២០១៤
ឆ្នាំជូត រាសីឡើងខ្ពស់ត្រដែត។ កិច្ចការសព្វសារពើដែលលោកអ្នកបានបំពេញនឹងទទួលបានជោគជ័យយ៉ាងត្រចះត្រចង់។ ការបំពេញកិច្ចការផ្សេងៗត្រូវបានអ្នកដទៃគាំទ្រនិងផ្តល់នូវកម្លាំងចិត្តដល់អ្នកធ្វើឲ្យអ្នកមានចិត្តសប្បាយរីករាយជាអនេក។ សុខភាពល្អការនិយាយស្តីប្រកបដោយវិចារណញ្ញាណ។ បញ្ហាស្នេហាដៃគូរបស់អ្នកនឹងបានយល់ពីទឹកចិត្តរបស់អ្នក។
ឆ្នាំឆ្លូវ រាសីមធ្យម។ ការពោលពាក្យសម្តីធ្វើឲ្យអ្នកផងយកចិត្តទុកដាក់ស្តាប់។ សុខភាពផ្លូវកាយ និងផ្លូវចិត្តអំណោយផលល្អ និងមានសមត្ថភាពបំពេញការងារប្រកបដោយស្មារតីប្រុងប្រយ័ត្នធ្វើឲ្យការបំពេញការងារបានផលគួរជាទីពេញចិត្ត។ ប៉ុន្តែគួរប្រុងប្រយ័ត្នការធ្វើដំណើរទៅកាន់ទីជិតឆ្ងាយ និងយកចិត្តទុកដាក់ចំពោះចំណងស្នេហារបស់អ្នកឲ្យបានច្រើន។
ឆ្នាំខាល រាសីស្រុតចុះខ្លាំង។ សុខភាពផ្លូវកាយត្រូវបៀតបៀនដោយជំងឺធ្វើឲ្យទឹកចិត្តច្របូកច្របល់។ សេចក្តីព្យាយាមត្រូវធ្លាក់ចុះ។ សមត្ថភាពក្នុងការបំពេញការងារត្រូវធ្លាក់ចុះ។ លោកអ្នកខ្វះសេចក្ដីក្លាហានក្នុងការសម្រេចចិត្ត។ ការប្រកបរបររកទទួលទានត្រូវខាតបង់ ដោយសារការធ្វេសប្រហែស។ សេចក្តីស្នេហាខ្វះភាពកក់ក្តៅចំពោះគ្នា និងអាចបង្កជាជម្លោះនានា។
ឆ្នាំថោះ រាសីឡើងខ្ពស់ត្រដែត។ រាល់ការប្រកបរបររកទទួលទានបានផលចំណេញគួរជាទីពេញចិត្ត។ ការនិយាយស្តីមានប្រយោជន៍ដល់អ្នកស្តាប់ និងមានចិត្តសោមនស្សរីករាយក្នុងការបំពេញអំពើជាកុសលផ្សេងៗ។ ការធ្វើដំណើរទៅកាន់ទីជិតឆ្ងាយគប្បីប្រយ័ត្ន។ បញ្ហាស្នេហាមានភាពចុះសម្រុងនឹងគ្នាល្អ។ លោកអ្នកអាចទទួលដំណឹងសប្បាយរីករាយក្នុងថ្ងៃនេះ។
ឆ្នាំរោង រាសីខ្ពស់ត្រដែត។ ការប្រកបរបររកទទួលទានចំណេញយ៉ាងគាប់ចិត្ត។ សុខភាពផ្លូវកាយរឹងប៉ឹងល្អ មានអារម្មណ៍ស្រស់ថ្លាគួរជាទីមេត្រីពីសំណាក់អ្នកផងទាំងពួង និងមានបង្កើតគំនិតច្នៃប្រឌិតទៅរកវឌ្ឍនភាពនៃអាជីវកម្ម។ ការធ្វើដំណើរទៅកាន់ទីជិតឆ្ងាយគប្បីប្រយ័ត្នបន្តិច។ គូស្នេហ៍ស្វែងយល់ចិត្តគ្នាយ៉ាងប្រពៃ និងមានអធ្យាស្រ័យល្អគ្នាទៅវិញទៅមក។
ឆ្នាំម្សាញ់ រាសីស្រុតចុះ។ លោកអ្នកមានចិត្តព្យាយាមយ៉ាងប្រពៃ ប៉ុន្តែខ្វះបញ្ញាធ្វើឲ្យការបំពេញការងារក៏ដូចជា ការប្រកបរបររកទទួលទានមិនសូវចំណេញ។ សុខភាពផ្លូវកាយល្អ តែផ្លូវចិត្តត្រូវញាំញីដោយបញ្ហា។ ការធ្វើដំណើរទៅកាន់ទី ជិតឆ្ងាយខ្វះការទទួលរាក់ទាក់ធ្វើឲ្យអ្នកស្រងាកចិត្ត។ ការនិយាយស្តីមិនសូវហុចផលតបមកវិញ។ សេចក្ដីស្នេហាមានសភាពជាធម្មតា។
ឆ្នាំមមី រាសីមធ្យម។ មានសមត្ថភាពប្រើកម្លាំងកាយជាងកម្លាំងប្រាជ្ញា។ នេះបណ្តាលមកពីលោកអ្នកមានសុខភាពផ្លូវកាយល្អ តែចិត្តមានការហ្មងសៅខ្លះៗ ហេតុនេះគួរអានសៀវភៅធម៌ ឬស្តាប់ព្រះធម៌ឲ្យបានច្រើន ដើម្បីជម្រះចិត្តសៅហ្មង។ រីឯការនិយាយស្តីក៏មិនសូវជាល្អប៉ុន្មានដែរ។ បញ្ហាស្នេហា គូស្នេហ៍របស់អ្នកយល់ពីទឹកចិត្តរបស់អ្នក ធ្វើឲ្យចំណងស្នេហ៍ផ្អែមល្ហែម។
ឆ្នាំមមែ រាសីឡើងខ្ពស់ត្រដែត។ ការប្រកបរបររកទទួលទានបានផលចំណេញហួសពីការរំពឹងទុក។ ការនិយាយស្តីត្រូវបានគេគោរពកោតសរសើរ។ ការធ្វើដំណើរទៅកាន់ទីជិតឆ្ងាយតែងទទួលបាននូវការស្វាគមន៍ផ្ដល់គារវៈ។ លោកអ្នកត្រូវបានមនុស្សជាច្រើនជ្រោមជ្រែងឆ្ពោះទៅរកជោគជ័យ។ រីឯបញ្ហាស្នេហាអ្នកនឹងទទួលបាននូវការគោរពជឿជាក់ខ្លាំងពីគូស្នេហ៍របស់អ្នក។
ឆ្នាំវក រាសីមធ្យម។ សុខភាពផ្លូវកាយ និងផ្លូវចិត្តអំណោយផលល្អជាធម្មតា។ រាល់ពាក្យពេចន៍សម្ដីពីរោះពិសាធ្វើឲ្យអ្នកផងទាំងពួងស្រឡាញ់រាប់អានចាំជួយជ្រោមជ្រែងកិច្ចការសព្វសារពើ។ ការធ្វើដំណើរគួរប្រយ័ត្នប្រយែងស្មារតីបន្តិច។ ការប្រកបរបររកទទួលទានអាចខាតបង់។ គូស្នេហ៍មានការយល់ចិត្តគ្នាជាធម្មតា គ្មានរឿងរ៉ាវអាក្រក់អ្វីកើតឡើងគួរឲ្យបារម្ភទេ។
ឆ្នាំរកា រាសីឡើងខ្ពស់ត្រដែត។ ទឹកចិត្តអង់អាចក្លាហានក្នុងការសម្រេចកិច្ចការប្រកបដោយភាពឈ្លាសវៃ។ ការប្រកបរបររកទទួលទាននឹងបាននូវផលចំណេញយ៉ាងគាប់ប្រសើរ។ គូស្នេហ៍មានការយកចិត្តទុកដាក់ និងសេចក្ដីទុកចិត្តចំពោះគ្នាមិនអាចមានអ្នកដទៃជ្រែកចូលបាន។ ការធ្វើដំណើរដើម្បីបំពេញការងារតែងមានជោគជ័យ និងលាភសក្ការៈជាប់ជានិច្ច។
ឆ្នាំច រាសីឡើងខ្ពស់។ លោកអ្នកមានសមត្ថភាពរិះរកដំណោះស្រាយបញ្ហានានាបានយ៉ាងប្រសើរ ពោលគឺ អាចសម្រេចការងារនានាបានដោយខ្លួនឯងប្រកបដោយជោគជ័យ និងទទួលបានលាភសក្ការៈលើសការរំពឹងទុក។ ការធ្វើដំណើរយកចិត្តទុកដាក់ និងមានសុវត្ថិភាពគ្រប់ទិសទី។ គូស្នេហ៍មានការស្វែងយល់ចិត្តគ្នាបានល្អពោរពេញដោយភាពផ្អែមល្ហែម។
ឆ្នាំកុរ រាសីឡើងខ្ពស់ត្រដែត។ រាល់ការនិយាយស្តីច្រើនពោលពាក្យពិតទៅកាន់អ្នកផងគ្នា។ ការប្រកបរបររកទទួលទានបានចំណេញយ៉ាងគាប់ចិត្តធ្វើឲ្យទឹកចិត្តរបស់ លោកអ្នកមានសន្ទុះខ្លាំងឡើងក្នុងការបំពេញការងារ។ ការធ្វើដំណើរទៅកាន់ទីជិតឆ្ងាយមានសុវត្ថិភាពល្អ។ រីឯបញ្ហាស្នេហាគូស្នេហ៍មានភាពល្អូកល្អិន និងយកចិត្តទុកដាក់ចំពោះគ្នាពេញទំហឹង។
No comments:
Post a Comment