រាសី ប្រចំាថ្ងៃចន្ទ ទី១៩ ខែឧសភា ឆ្នាំ២០១៤
ឆ្នាំជូត រាសីមធ្យម។ លោកអ្នកមានប្រៀបខាងកម្លាំងកាយជាជាងកម្លាំងប្រាជ្ញា។ មានការហ្មងសៅ ហើយលោកអ្នកគួរជម្រះចិត្តសៅហ្មងទើបអាចត្រៀមខ្លួនទទួលជោគជ័យ។ រីឯការនិយាយស្តីក៏មិនសូវជាល្អប៉ុន្មានដែរ។ លោកអ្នកអាចទទួលដំណឹងល្អខ្លះៗ។ បញ្ហាស្នេហា គូស្នេហ៍អាចទាស់ទែងគ្នាព្រោះរឿងតូចតាច។
ឆ្នាំឆ្លូវ រាសីឡើងខ្ពស់ត្រដែត។ រាល់ការសម្រេចភារកិច្ចតែងទទួលបានជោគជ័យជានិច្ច។ ការនិយាយស្តីប្រកបដោយហេតុផលត្រឹមត្រូវធ្វើឲ្យលោកអ្នកមានប្រៀបលើដៃគូសន្ទនា។ សុខភាពល្អមានស្មារតីភ្លឺស្វាងមានសមត្ថភាពគិតបញ្ហាដែលនៅចំពោះមុខបានយ៉ាងល្អ។ ការធ្វើដំណើរប្រកបដោយការប្រុងប្រយ័ត្នខ្ពស់។ ស្នេហាមានការចុះសម្រុងគ្នាធម្មតា។
ឆ្នាំខាល រាសីស្រុតចុះ។ ទឹកចិត្តប្រកបដោយទោមនស្ស ទាមទារឲ្យមានភាពស្ងប់ស្ងាត់ទើបអាចធ្វើការសម្រេចចិត្តបាន ។ ការប្រកបរបររកទទួលទានខាតបង់។ ការធ្វើដំណើរទៅកាន់ទីជិតឆ្ងាយតែងមានឧបសគ្គរារាំង។ ដោយឡែកបញ្ហាស្នេហាគូស្នេហ៍យល់ពីក្តីលំបាករបស់អ្នក និងយកចិត្តទុកដាក់ដល់រូបអ្នកពេញទំហឹង។
ឆ្នាំថោះ រាសីឡើងខ្ពស់ត្រដែត។ សុខភាពរាងកាយរឹងមាំ ធ្វើឲ្យអារម្មណ៍ជ្រះថ្លាពោរពេញដោយប្រាជ្ញាស្មារតីខ្ពស់ក្នុងការបំពេញការងារប្រកបដោយជោគជ័យត្រចះត្រចង់។ លោកអ្នកអាចទទួលបានជំនូន ឬអំណោយពីអ្នកណាម្នាក់។ ការធ្វើដំណើរទៅទីជិតឆ្ងាយមានសុវត្ថិភាពគ្រប់ទិសទី។ ស្នេហារងការញុះញង់ពីអ្នកដទៃតែដៃគូមានជំនឿមុតមាំលើគ្នាទៅវិញទៅមក។
ឆ្នាំរោង រាសីឡើងខ្ពស់ត្រដែត។ ទឹកចិត្តពោរពេញទៅដោយក្តីសោមនស្សរីករាយក្នុងផ្លូវត្រឹមត្រូវប្រពៃ។ រាល់ការបំពេញកិច្ចការសម្រេចដូចក្ដីប្រាថ្នាជាក់ជាពុំខានឡើយ។ រីឯការធ្វើដំណើរមានការប្រុងប្រយ័ត្នខ្ពស់។ លោកអ្នកមានសតិសម្បជញ្ញៈ។ រីឯបញ្ហាស្នេហាគូស្នេហ៍របស់អ្នកនឹងមានការទុកចិត្តចំពោះអ្នកកាន់តែខ្លាំងធ្វើឲ្យចំណងស្នេហ៍ផ្អែមល្ហែមដូចទឹកឃ្មុំ។
ឆ្នាំម្សាញ់ រាសីមធ្យម។ សុខភាពផ្លូវកាយក្តីផ្លូវចិត្តក្តីមានភាពល្អប្រសើរតែគួរប្រយ័ត្នចំពោះការពោលពាក្យសម្តីទៅកាន់អ្នកផង ព្រោះអាចមានគេនិន្ទា។ ការប្រកបរបររកទទួលទានបានផលជាបង្គួរ។ ការធ្វើដំណើរទៅទីជិតឆ្ងាយមានសុវត្ថិភាពធម្មតា។ រីឯបញ្ហាស្នេហាមិនគួរបណ្តាលឲ្យមានការទាស់ពាក្យសម្តីគ្នាទេ បើពុំដូច្នោះនឹងធ្វើឲ្យរឿងតូចក្លាយទៅជារឿងធំរាលដាលពុំខាន។
ឆ្នាំមមី រាសីឡើងខ្ពស់ត្រដែត។ រាល់ការប្រកបរបររកទទួលទាន ឬបំពេញកិច្ចការផ្សេងៗបានផលក្រាស់ក្រែល ប៉ុន្តែអ្វីដែលលោកអ្នកត្រូវប្រយ័ត្ននោះគឺកុំភ្លេចខ្លួនប្រើភាសាក្រអឺតក្រទមនាំឲ្យអ្នកផងទាំងឡាយពេបជ្រាយ។ ការធ្វើដំណើរទៅកាន់ទីជិតឆ្ងាយគួរប្រយ័ត្នបន្តិច។ ទឹកចិត្តមានក្តីសោមនស្សរីករាយ រីឯសុខភាពក៏ល្អបរិបូរណ៍។ គូស្នេហ៍មានភាពស្អិតល្មួតនឹងគ្នា។
ឆ្នាំមមែ រាសីល្អបង្គួរ។ សុខភាពផ្លូវកាយនិងផ្លូវចិត្តមានអំណោយផលល្អ និងមានសមត្ថភាពបំពេញការងារប្រកបដោយស្មារតីខ្ពស់ធ្វើឲ្យការបំពេញការងារទទួលបានផលគួរសម។ ការពោលពាក្យសម្តីធ្វើឲ្យអ្នកផងយកចិត្តទុកដាក់ស្តាប់។ ប៉ុន្តែគួរប្រុងប្រយ័ត្នចំពោះការធ្វើដំណើរទៅកាន់ទីជិតឆ្ងាយ និងគួរយកចិត្តទុកដាក់ចំពោះចំណងស្នេហារបស់លោកអ្នក។
ឆ្នាំវក រាសីស្រុតចុះ។ រាល់ការបំពេញការងារផ្សេងៗពោរពេញដោយឧបសគ្គសុខភាពមានបញ្ហាខ្លះៗដែលមកពីបរិយាកាសជុំវិញខ្លួន។ ការនិយាយស្តីតែងមានគេនិន្ទាធ្វើឲ្យអ្នកមានការអាក់អន់ស្រពន់ចិត្តជាខ្លាំង។ ការធ្វើដំណើរជិតឆ្ងាយមានសុវត្ថិភាពធម្មតា។ រីឯបញ្ហាស្នេហាគូស្នេហ៍ខ្វះការយល់ចិត្តគ្នាជាហេតុបណ្តាលឲ្យមានការបែកបាក់ ឬទំនាស់តូចធំជាដើម។
ឆ្នាំរកា រាសីស្រុតចុះ។ លោកអ្នកមានសមត្ថភាពបំពេញការងារ ប៉ុន្តែត្រូវរង់ចាំឱកាសល្អក្នុងការបញ្ចេញស្នាដៃ។ ការនិយាយស្តីរអាក់រអួល ព្រោះកង្វះជំនឿចិត្ត។ ការធ្វើដំណើរទៅទីជិតឆ្ងាយដើម្បីបំពេញការងារអាចជួបឧបសគ្គលំបាកលំបិនមុននឹងសម្រេចដល់គោលដៅ។ គូរស្នេហ៍មិនសូវយល់ចិត្តគ្នា ព្រោះតែអារម្មណ៍អន្ទះសាស្មុគស្មាញផ្នែកការងារ។
ឆ្នាំច រាសីមធ្យម។ កត្តាចម្បងគួរយកចិត្តទុកដាក់ទៅលើសុខភាពទាំងផ្លូវកាយ និងផ្លូវចិត្ត បើពុំនោះទេនឹងបណ្តាលឲ្យហេតុការណ៍មិនល្អកើតឡើងដូចជា ការពោលពាក្យសម្តីមិនសូវពីរោះពិសាមិនទទួលបានការជ្រោមជ្រែងពីអ្នកដទៃខ្វះសមត្ថភាពបំពេញការងារឲ្យបានល្អធ្វើឲ្យមុខរបរត្រូវខាតបង់។ គូស្នេហ៍មានការយល់ចិត្តគ្នាជាធម្មតាមិនមានបញ្ហាល្អក់កករអ្វីទេ។
ឆ្នាំកុរ រាសីឡើងខ្ពស់ត្រដែត។ កិច្ចការសព្វសារពើបានជោគជ័យជាទីមោទនៈ ប៉ុន្តែលោកអ្នកក៏ត្រូវប្រយ័ត្នអ្នកច្រណែនឈ្នានីសចាំមើលបំណាំផងដែរ។ ទឹកចិត្តមានការគិតគូរវែងឆ្ងាយ រីឯសុខភាពផ្លូវកាយសុខសប្បាយធម្មតាដែរ។ ការនិយាយស្តីមានវិចារណញ្ញាណ។ ការធ្វើដំណើរជិតឆ្ងាយមានជោគលាភ។ គូស្នេហ៍មានការយកចិត្តទុកដាក់ចំពោះគ្នាខ្លាំង។
No comments:
Post a Comment